རིས་མེད་བསྟན་རྒྱས་སྨོན་ལམ།

ཐེངས། 11939 བཀླགས་འདུག

ས་གསུམ་འདི་ན་མཚུངས་པ་ཀུན་བྲལ་མཆོག །
ཁམས་གསུམ་མུན་སེལ་འོད་སྟོང་ཟླ་མེད་པ། །
སྐྱབས་གསུམ་ཀུན་འདུས་ཟས་གཙང་སྲས་པོ་ཡི། །
ཐེག་གསུམ་བསྟན་པ་ཕྱོགས་མཐའ་རྒྱས་གྱུར་ཅིག །

བྷོ་ཊའི་སྨག་རུམ་སྟུག་པོ་གཞོམ་སླད་དུ། །

ཐུབ་བསྟན་སྐྱ་རེངས་སྣང་བ་ཕྱོགས་བརྒྱར་བཀྱེས། །

འགྲོ་ཀུན་འདྲེན་པའི་དེད་དཔོན་མཆོག་གྱུར་པའི། །

སྔ་འགྱུར་ཟབ་གསང་ཕྱོགས་ལས་རྒྱལ་གྱུར་ཅིག །

མདོ་རྒྱུད་ཟུང་འདྲེས་ཤྰཀྱའི་བསྟན་པ་འདི། །

གངས་རིའི་ཁྲོད་དུ་ཉི་འོད་རབ་འཕྲོས་ནས། །

དྲི་མེད་ལྟ་གྲུབ་འགྲོ་ཁམས་མུན་བསལ་བའི། །

ས་སྐྱའི་བཤད་སྒྲུབ་འཛམ་གླིང་ཁྱབ་གྱུར་ཅིག །

བཀའ་ཕྱག་ཆུ་བོ་གཅིག་འདྲིས་སྲོལ་བཟང་དང་། །

གསང་ཆེན་སྒྲུབ་བརྒྱུད་བྱིན་རླབས་མི་ཉམས་པ། །

བཤད་སྒྲུབ་ཉི་འོད་ཁམས་གསུམ་ཀུན་ཁྱབ་ནས། །

བཀའ་བརྒྱུད་རིང་ལུགས་རྟག་ཏུ་རྒྱས་གྱུར་ཅིག །

དཔྱད་གསུམ་དག་པའི་དྲི་མེད་བསྟན་པ་ལ། །

འཆད་རྩོད་རྩོམ་གསུམ་འགྲན་པའི་ཟླ་བྲལ་བ། །

བཀའ་གདམས་གསར་མ་དགེ་ལྡན་བཤད་པའི་སྲོལ།

རབ་འབྱམས་ཁྱོན་ཀུན་ཡོངས་སུ་ཁྱབ་གྱུར་ཅིག །

དྲིན་ཆེན་རྩ་བའི་བླ་མའི་བྱིན་རླབས་དང་། །

རླབས་ཆེན་སྨོན་ལམ་མ་ལ་ཡ་རླུང་གིས། །

རྒྱ་ཆེན་བདེ་བར་གཤེགས་པའི་བསྟན་པ་འདི། །

ས་ཆེན་འཇིག་རྟེན་ཁམས་ཀུན་ཁྱབ་གྱུར་ཅིག །

མདོར་ན་དམ་ཆོས་རིན་ཆེན་གངས་རིའི་ངོས་། །

ལན་གཅིག་མ་ཡིན་བལྟ་བའི་སྐལ་བཟང་རྟེན། །

ཇི་སྲིད་སངས་རྒྱས་ངོ་བོར་མ་གྱུར་བར། །

དེ་སྲིད་དེ་ཉིད་རེག་པའི་བཀྲ་ཤིས་ཤོག །

ཅེས་བསྟན་རྒྱས་སྨོན་ལམ་འདི་སྲིང་མོ་འཛོམ་དབྱངས་ལྷ་མོས་བསྐུལ་ངོར་གངས་རི་ཀརྨ་བསྟན་འཛིན་ཀུན་དགའ་ཆོས་ཀྱི་རྒྱལ་མཚན་གྱིས་ཕྱི་ལོ་༡༩༩༥་ཟླ་བ་༡༠་ཚེས་༢༥་ལ་ཙང་རོང་རི་ཁྲོད་དུ་བྲིས་པ་རྣམས་ཅུང་བཅོས་ཡོད།