༄༅།། རྒྱལ་ཡོངས་རིས་མེད་ཀྱི་མདོ་སྔགས་ཟུང་གི་ལྟ་གྲུབ་བགྲོ་གླེང་ཚོགས་ཆེན་ཐེངས་གཉིས་པ་དེ་སྟོན་པ་གཤེན་རབ་མི་བོ་ཆེ་འདས་ནས་ལོ་༡༨༠༣༦ དང་། སྟོན་པ་ཐུབ་པའི་དབང་པོ་འདས་ནས་ལོ་༢༥༦༣ རབ་གནས་ས་ཕག་ལོའི་གྲོ་བཞིན་ཟླ་བའི་ཡར་ཚེས་༡༠ཕྱི་ལོ་༢༠༡༩ལོའི་ཕྱི་ཟླ་༩ཕྱི་ཚེས་༨དང་༩བཅས་ཉིན་གཉིས་རིང་སྡེ་ར་ལྡུན་དོན་གྲུབ་གླིང་གཞིས་སུ་གསང་ཆེན་སྔ་འགྱུར་རྙིང་མ་པའི་གདན་ས་ཆེན་མོ་འོག་མིན་ཨོ་རྒྱན་སྨིན་གྲོལ་གླིང་གི་བཤད་གྲྭ་སྔ་འགྱུར་མཐོ་སློབ་མདོ་རྒྱུད་ལེགས་བཤད་གླིང་དུ་དགའ་མོས་སྤྲོ་གསུམ་དང་། ཟབ་བརླིང་ཤིས་གསུམ་གྱི་ཐོག་གནད་སྨིན་དོན་ཁེལ་ངང་ཚོགས་ཐུབ་པ་བྱུང་བ་རེད། དེའང་རང་ཅག་ཁ་བ་རི་པ་རྣམས་ལ་བཀའ་དྲིན་གསོབ་པར་དཀའ་བའི་ཨོ་རྒྱན་གྱི་སློབ་དཔོན་ཆེན་པོ་པདྨ་སཾབྷ་ཝ་ལྷོ་ནུབ་འོ་མ་ཅན་གྱི་མཚོ་རུ་ཡ་མཚན་གྱི་པདྨའི་ལྡོང་པོ་ལས་སྐུ་བལྟམས་པའི་དུས་ཆེན་ཁྱད་པར་ཅན་བོད་ཚེས་བཅུའི་ཉིན་དབུ་འཛུགས་ཞུས་ཤིང་། ཐེངས་འདིའི་བགྲོ་གླེང་དེ་འཇམ་མགོན་བླ་མ་ཙོང་ཁ་བ་ཆེན་པོ་དགོངས་པ་ཆོས་དབྱིངས་སུ་གཤེགས་ནས་ལོ་༦༠༠འཁོར་བའི་རྗེས་དྲན་མཚན་ཐོག་ཏུ་ཕུལ་བ་ཞིག་ཀྱང་ཡིན། བགྲོ་གླེང་འདིའི་གྲུབ་ཆ་ནི། བན་བོན་གཉིས་ཟུང་འབྲེལ་ཐོག་བོད་ཀྱི་ཆོས་བརྒྱུད་ཆེན་མོ་དྲུག་གི་གསུང་བཤད་པ་རེ་དང་གདན་ས་སྨིན་གྲོལ་གླིང་གི་༧སྐྱབས་རྗེ་སྨིན་གླིང་མཁན་ཆེན་རིན་པོ་ཆེ་དབུས་པའི་བཤད་གྲྭའི་དབུ་ལས་མཁན་སློབ་འདུས་མང་། དེ་བཞིན་ཆེད་ཞུས་ཀྱི་སྐུ་མགྲོན་རྣམ་པ་གཙོས་ཟུར་ཉན་པ་དང་དབུས་རྒྱུན་རྣམ་པ་ལས་གྲུབ་པ་ཞིག་ཡིན། དམིགས་ཡུལ་ནི། བོད་ཀྱི་ཆོས་བརྒྱུད་ཆེན་མོ་དྲུག་གི་སོ་སོའི་ཐུན་མིན་མདོ་སྔགས་གཉིས་ཀྱི་ལྟ་བའི་བཞེད་མཚམས་དང་ཆེ་བ་དག་ཆོས་བརྒྱུད་ཕན་ཚུན་བར་བགྲོ་གླེང་གི་ལམ་ནས་མཁྱེན་རྟོགས་དང་རྒྱུས་ལོན་ཡོང་ཕྱིར་གཙོ་བོར་དམིགས་པ་ཞིག་ཡིན། དེའང་རིས་སུ་མ་ཆད་པའི་མཁྱེན་ཡངས་གསུང་བཤད་པ་རྣམས་ཆོས་བརྒྱུད་ཆེན་མོ་དྲུག་གི་གདན་ས་ཁག་ལ་རེས་མོས་ལྟར་ཕར་བཅར་ཏེ་བགྲོ་གླེང་བྱེད་ཐུབ་ན་གང་ཅིའི་ཐད་ནས་དགེ་མཚན་ཆེ་བར་མཐོང་སྟེ་གདན་ས་ཁག་སོ་སོར་ཆེད་བཅར་གྱིས་བགྲོ་གླེང་ཞུས་དང་ཞུ་མུས་དེ་ལྟར་ཡིན། བགྲོ་གླེང་སྐབས་སུ་སྐུ་མགྲོན་གཙོ་བོ་༧སྐྱབས་རྗེ་སྨིན་གླིང་མཁན་ཆེན་མཆོག་ནས་བཀའ་སློབ་བསྩལ་དོན། “ང་ཚོ་འདི་ལྟར་འཛོམས་དགོས་པའི་དམིགས་ཡུལ་གཙོ་བོ་དེ་ཆོས་བརྒྱུད་ཕན་ཚུན་བར་ལྟ་གྲུབ་སྐོར་དཔྱད་པ་མང་པོ་བྱེད་དགོས་པ་དེ་རེད། འདི་དངོས་གནས་གལ་ཆེན་པོ་ཞིག་དང་རྩ་ཆེན་པོ་ཞིག་མཐོང་གི་འདུག ང་ཚོ་ལྟ་གྲུབ་ཀྱི་སྐོར་དེ་དངོས་གནས་དྲང་གནས་ས་ལམ་བགྲོད་ནས་སངས་རྒྱས་ཀྱི་གོ་འཕང་བསྒྲུབ་ཡ་དེ་ཆོས་བརྒྱུད་ཆེན་པོ་ཚང་མ་གཅིག་པ་གཅིག་ཀྱང་རེད་བསྡད་ཀྱི་ཡོད་རེད། གཙོ་བོ་རྒྱུད་ཉོན་མོངས་སྤང་ཡ་རེད། ཚང་མས་དེ་ག་རང་ཉམས་ལེན་སྐོར་བཤད་བསྡད་ཡོད་རེད། དོན་དག་གཞན་ཅི་གང་བཤད་ཀྱི་ཡོད་མ་རེད། ”ཅེས་དང་། “དེ་རིང་ལྟ་བུར་བགྲོ་གླེང་གི་སྒོ་ནས་ཕན་ཚུན་བཤད་ཐུབ་ཡ་དེ་དཔེ་གལ་ཆེན་པོ་འདུག དེ་ལ་རྟེན་ནས་གོ་བ་ཡག་པོ་ཆགས། གཅིག་གིས་གཅིག་ལ་བརྟེན་ནས་ཕན་ཚུན་མཐུན་འབྲེལ་དང་། དེའི་ནང་ནས་དེ་རིང་ལྟ་གྲུབ་ཀྱི་བགྲོ་གླེང་འདིའི་ནང་ན་བཞུགས་སྡད་མཁན་བཤད་གྲྭ་འདིའི་སློབ་ཕྲུག་ཁྱེད་རྣམ་པ་ཚོས་དུས་ཚོད་འཕྲོག་རླག་མ་གཏོང་། འདིའི་ནང་དུ་པར་གང་འདྲ་རྒྱབ་ཀྱི་འདུག སྐད་ཕྲིན་གང་འདྲ་བྱས་ནས་གཏང་དགོས་ཀྱི་འདུག དེ་ཚོ་བསམ་བློ་བཏང་སྟེ་མ་བསྡད་པར། ད་རེས་བགྲོ་གླེང་ག་རེ་བྱས་སོང་། མཁས་དབང་སོ་སོའི་འཛིན་མཚམས་གང་འདྲ་འདུག་ལྟོས། ཁོང་རྣམ་པ་ཚོས་རང་རང་སོ་སོས་དཀའ་ལས་བརྒྱབ། སྡུག་རུས་བྱས་ནས་མཁན་སློབ་དགེ་བའི་བཤེས་གཉེན་ཆགས་བསྡད་ཡོད་རེད། ཉམས་ལེན་བྱས་པ་ཡིན་ནའང་འདྲ་ག་རེ་ཡིན་ནའང་། བགྲོ་གླེང་གི་རིགས་དེ་དཔེ་གལ་ཆེན་པོ་རེད།” ཡང་། “བོད་གངས་ཅན་གྱི་ཆོས་ལུགས་དེ་ཚོ་རྡོག་རྩ་གཅིག་སྒྲིལ་བྱེད་དགོས་རེད། རྡོག་རྩ་གཅིག་སྒྲིལ་ཞེས་པ་དེ་གཞན་གང་ཡང་ཡོད་མ་རེད། གཅིག་གིས་གཅིག་ལ་ཡིད་ཆེས་བྱེད། ངོས་ལེན་བྱེད་ཡ་དེ་ཚོ་རྡོག་རྩ་གཅིག་སྒྲིལ་རེད་མ་གཏོགས་གཞན་རྡོག་རྩ་གཅིག་སྒྲིལ་ཆགས་ཡ་རྒྱུ་མཚན་གང་ཡང་མཐོང་གི་མི་འདུག” ཅེས་བཀའ་སློབ་རིན་ཐང་བྲལ་བ་དུ་མ་གནང་སོང་། ད་དུང་རིས་མེད་མཐུན་ཚོགས་ཀྱིས་འགྲེམས་སྤེལ་ཞུས་པའི་༼རིས་མེད་ཀྱི་དགེ་ཕན་༽ཞེས་པའི་ལོ་དེབ་འདོན་ཐེངས་དང་པོ་དེའི་ཞལ་ཕྱེའི་བཀའ་དྲིན་ཡང་བཅང་གནང་སོང་། དེ་ནས་སྔ་འགྱུར་མཐོ་སློབ་ཀྱི་ཚོགས་གཙོ་མཆོག་ནས་བགྲོ་གླེང་ཞུ་ཕྱོགས་སྐོར་གསུང་བཤད་གནང་བ་དང་། རྒྱ་གར་ས་གནས་རྒྱ་སྤྱིའི་རིས་མེད་ཆོས་བརྒྱུད་མཐུན་ཚོགས་ཀྱི་ཚོགས་གཞོན་མཆོག་ནས་རྒྱལ་སྤྱིའི་རིས་མེད་མཐུན་ཚོགས་དབུས་ས་གཉིས་ཀྱི་ལོ་རྒྱུས་སྒྲོག་བྱང་གནང་། ཉིན་གཉིས་ཀྱི་མདོ་འཛིན་པ་རྒྱལ་སྤྱིའི་རིས་མེད་ཆོས་བརྒྱུད་མཐུན་ཚོགས་ཀྱི་ཚོགས་གཙོས་གནང་ཞིང་། བགྲོ་གླེང་གཙོ་སྐྱོང་པ་གཉིས་ཀྱིས་སྔ་དྲོར་དང་ཕྱི་དྲོར་རེས་མོས་ལྟར་བགྲོ་གླེང་གཙོ་སྐྱོང་གནང་། བགྲོ་གླེང་གི་ནང་དོན་དངོས་ལ་མ་འཇུག་གོང་དུ་གསུང་བཤད་སློབ་དཔོན་དྲུག་ཀས་རིས་མེད་ཀྱི་དགེ་མཚན་སྐོར་གསུང་བཤད་རེ་གནང་ཡོད་ཅིང་། བགྲོ་གླེང་གསུང་བཤད་གནང་མཁན་རིམ་པ་དང་པོ། ས་སྐྱའི་གསུང་བཤད་པ་མཁན་པོ་ཚུལ་ཁྲིམས་དཔལ་ལྡན་མཆོག་ནས་རྩོམ་ཤོག་གི་ཞལ་བྱང་ས་སྐྱའི་ལྟ་གྲུབ་རྣམ་བཞག ཅེས་པའི་ཐོག་སྐྱའི་བསྟན་པའི་འཕེལ་རིམ་དང་། བཤད་སྒྲུབ་གཙོ་བོར་མཛད་པའི་ཆོས་སྐོར། གདུལ་བྱ་བཀྲི་ཚུལ། གྲུབ་མཐའི་ཁྱད་ཆོས་ལྟ་བའི་རྣམ་བཞག  ལྟ་བའི་རྣམ་བཞག་བྱེ་བྲག་ཏུ་བཤད་པ། …

༄༅། །བོད་བརྒྱུད་རྒྱལ་བསྟན་སྤྱི་ལ་དད་མོས་དང་དམ་ཚིག་ཟབ་པའི་རྒྱལ་ཕྱི་ནང་གར་སར་བཞུགས་པའི་སེར་སྐྱ་ཕོ་མོ་ཡོངས་ཀྱི་སྙན་ལམ་དུ། ཆེད་དུ་ཞུ་གསོལ། རྒྱལ་སྤྱིའི་བོད་ཀྱི་རིས་མེད་ཆོས་བརྒྱུད་མཐུན་ཚོགས་འདི་ཉིད་དབུ་བརྙེས་ནས་ལོ་ངོ་བརྒྱད་ཙམ་ཟིན་ཅིང་ལོ་ལྟར་དབུས་རྒྱུན་ཚོགས་ཆེན་ཐེངས་རེ་ཆད་མེད་དུ་འཚོགས་མུས་ལྟར། འདི་ལོའི་དབུས་རྒྱུན་ཚོགས་ཆེན་ཐེངས་བརྒྱད་པ་དེ་ཨ་རི་བྷོ་སི་ཊོན་གྱི་མངའ་ཁོངས་སུ་ཡོད་པའི་དགེ་བཤེས་ངག་དབང་འཕྲིན་ལས་ཀྱི་ཆོས་ཚོགས་སུ་ཕྱི་ལོ་༢༠༡༨ ཕྱི་ཟླ་༧་ཕྱི་ཚེས་༤ དང་༥ བཅས་ཉིན་གཉིས་རིང་འཚོགས་གཏན་ཁེལ་བས་རིས་མེད་ལ་དུང་ཞིང་ལྷག་སེམས་དཀར་བའི་མཁྱེན་ལྡན་པ་རྣམ་པ་དང་མི་མང་དཀྱུས་མ་རིགས་སུ་ཞིག་ཚོགས་བཅར་དུ་ཕེབས་འདུན་ཡོད་ནའང་དགའ་བསུ་ཡོད་ཅིང་། ཚོགས་ཞུགས་པ་རྣམ་པས་སྔར་ཙམ་ནས་གཤམ་གྱི་འབྲེལ་མཐུད་ཁ་བྱང་ཐོག་ཏུ་འབྲེལ་བ་གནང་རོགས་ཞུ། དབུས་རྒྱུན་ཚོགས་ཆེན་སྐབས་བརྒྱད་པའི་འཚོགས་འཆར་བགྲོ་གླེང་གི་བརྗོད་གཞི་ཁག ༡༽  ཆོས་བརྒྱུད་ཕན་ཚུན་མཐུན་སྒྲིལ་དམ་ཟབ་ཡོང་ཕྱིར་ས་གནས་ས་ཁུལ་སོ་སོར་ཆོས་ཚོགས་ཁག་མཉམ་འཛོམས་གནང་སྟེ་རིས་མེད་ལྟ་གྲུབ་བགྲོ་གླེང་དང་ཉམ་མྱོང་བསྡུ་ལེན། སྙིང་གཏམ་ཤོད་རེས་སོགས་གནང་རྒྱུ། ༢༽   སྔར་ལས་དྲིལ་སྒྲག་ཚགས་ཚུད་དང་ཤུགས་ཆེ་རུ་གཏང་རྒྱུ། ༣༽   མ་འོང་རྒྱུན་ལས་ཚོགས་ཆེན་འཚོགས་ཡུལ་དང་འཚོགས་དུས་གཏན་ཁེལ་གནང་རྒྱུ། ༤༽    ས་གནས་ཡན་ལག་ཚོགས་པ་གསར་འཛུག་གནང་རྒྱུ། ༥༽    རིས་མེད་ཀྱི་དགེ་མཚན་གླེང་རྒྱུ། ༦༽   རྒྱུན་ལས་སྐབས་གོང་མ་དང་ལོ་སྔ་མར་དག་ཏུ་ལས་འཇུག་ལུས་བསྡད་པ་དང་ལག་བསྟར་མ་བྱས་པ་དག་འགོ་འཛུག་དང་རྒྱུན་སྐྱོང་གནང་རྒྱུ། ༧༽   ཆོས་བརྒྱུད་ཕན་ཚུན་བར་མཚན་སྨད་ཞུ་མཁན་དག་ལ་ཆོས་བརྒྱུད་ཁོང་སོ་སོ་ནས་འགན་ཁུར་ཏེ་དེ་ཚོར་གསལ་བཤད་གོ་བཀོན་གྱིས་དེ་རིགས་མི་ཡོང་བའི་ཐབས་ཤེས་གནང་རྒྱུ། ༨༽   རིས་མེད་ཆོས་བརྒྱུད་ཕན་ཚུན་བར་མཐུན་ལམ་ཇི་ལྟར་ཡར་རྒྱས་གཏང་ཕྱོགས་སྐོར།        དབུས་རྒྱུན་ཚོགས་ཆེན་ཐེངས་བརྒྱད་པའི་འཚོགས་ཡུལ་ཨ་རི་བྷོ་སི་ཊོན་ཀུ་རུ་ཀུ་ལ་བོད་བརྒྱུད་ནང་བསྟན་ཆོས་ཚོགས།