» རྒྱལ་སྤྱིའི་བོད་ཀྱི་རིས་མེད་ཆོས་བརྒྱུད་མཐུན་ཚོགས་ཀྱི་ཚོགས་ཆེན་ཐེངས་བརྒྱད་པ།

ཐེངས། 78864 བཀླགས་འདུག

རྒྱལ་སྤྱིའི་བོད་ཀྱི་རིས་མེད་ཆོས་བརྒྱུད་མཐུན་ཚོགས་ཀྱི་ཚོགས་ཆེན་ཐེངས་བརྒྱད་པ། ཨ་རིའི་བྷོ་སི་དྲོན་གྲོང་ཁྱེར་ Boston City དུ་ཡོད་པའི་ཀུ་རུ་ཀུ་ལེ་ཆོས་ཚོགས་ནས་བཀོད་སྒྲིག་གནང་བ་ལྟར་བསྐོང་འཚོགས་གནང་།

ཕྱི་ལོ་ ༢༠༡༨ ཕྱི་ཟླ་ ༧ ཚེས་ ༤ ཉིན་ཏེ་ཨ་རིའི་རྒྱལ་སྟོན་དུས་ཆེན་གྱི་ཉིན་མོའི་ཞོགས་པའི་དུས་ཚོད ༩ ཐོག བོད་ཀྱི་ཆོས་བརྒྱུད་ཆེན་པོ་དྲུག་སྟེ་གཡུང་དྲུང་བོན། སྔ་འགྱུར་སྙིང་མ། འགྲོ་མགོན་བཀའ་བརྒྱུད་པ། དཔལ་ལྡན་ས་སྐྱ་པ། རྒྱལ་བ་ཇོ་ནང་པ། རི་བོ་དགེ་ལྡན་པ་བཅས་ཀྱི་བླ་སྤྲུལ་མཁན་པོ་དགེ་བཤེས་བཅས་ཚོགས་བཅར་བ་རྣམས་ཚོགས་ཁང་དུ་དགྱེས་འཛོམས་གནང་ཞིང་། ཐོག་མར་སྐུ་པར་མཐོང་གྲོལ་རིན་པོ་ཆེར་མཇལ་དར་ཕུལ་ཞིང་། མར་མེ་ཞལ་འབྱེད་གནང་བསྟུན། ཚོགས་འདུའི་གཙོ་སྐྱོང་བར་བསོད་རྒན་རིན་པོ་ཆེ་དང་། ཚོགས་དྲུང་ལ་བེ་རི་རིག་པའི་རྡོ་རྗེ་གཉིས་བསྐོ་བཞག་གནང་གྲུབ་རྗེས། ཚོགས་འདུ་གཙོ་སྐྱོང་བས་ཚོགས་འདུའི་ལས་རིམ་གསལ་བསྒྲགས་གནང་།

དེ་རྗེས་རིས་མེད་ཆོས་བརྒྱུད་མཐུན་ཚོགས་ཀྱི་ཚོགས་གཙོ་ལྕགས་ཁུང་འཇིགས་མེད་དབང་གྲགས་རིན་པོ་ཆེ་མཆོག་གིས། ཚོགས་འདུ་དབུ་འབྱེད་ཀྱི་གསུང་བཤད་དང་། ཚོགས་ཞུགས་པ་རྣམས་ཀྱིས་སོ་སོ་ངོ་སྤྲོད་དང་འབྲེལ་བརྗོད་གཞི་དང་པོ་དང་གཉིས་པའི་ཐོག་བགྲོ་གླེང་ལྷུག་པོར་གནང་།

ཉིན་གུང་ས་གནས་བོད་རིགས་མི་མང་སུམ་བརྒྱ་ལྷག་མཉམ་འཛོམས་ཀྱིས་༧གོང་ས་༧སྐྱབས་མགོན་ཆེན་པོ་མཆོག་གི་སྐུའི་འཁྲུངས་སྐར་དང་། ཨ་རིའི་རྒྱལ་སྟོན་དུས་ཆེན་གཉིས་ཀྱི་མཛད་སྒོ་སྟབས་གཅིག་ཏུ་བསྡུས་ཤིང་། སྐུ་མགྲོན་གཙོ་བོ་བོད་གཞུང་ནང་སྲིད་བཀའ་བློན་བསོད་ནམས་སྟོབས་རྒྱལ་མཆོག་དང་། ཆོས་བརྒྱུད་ཆེན་པོ་དྲུག་གི་སྐུ་ཚབ་རྣམས་ཀྱིས་སྐུའི་འཁྲུངས་སྐར་དང་འབྲེལ་བའི་གསུང་བཤད་ཞིབ་རྒྱས་གནང་།

ཕྱི་དྲོར་མུ་མཐུད་དུ་ཚོགས་འདུ་འཚོགས་ཏེ་བརྗོད་གཞི་གསུམ་པ་ནས་ལྔ་བའི་བར་བགྲོ་གླེང་ཞིབ་རྒྱས་གྲུབ་བསྟུན། ས་གནས་བོད་རིགས་མཐུན་ཚོགས་ཀྱིས་གདན་ཞུས་ལྟར། ཚོགས་བཅར་བ་རྣམས་བོད་རིགས་སྤྱི་མཐུན་ཚོགས་པའི་ཚོགས་ཁང་གསར་བར་ཕེབས་ཏེ། ཚོགས་ཁང་རབ་གནས་དང་དགོང་དྲོའི་བཞེས་ལག་མཉམ་རོལ་མཛད།

ཚེས་ ༥ ཉིན་གྱི་ཞོགས་པའི་དུས་ཚོད་ ༩-༥ བར་གྲོས་གཞི་དོན་ཚན་དྲུག་པ་ནས་བརྒྱད་པའི་བར་བགྲོ་གླེང་ཞིབ་རྒྱས་སུ་གནང་མཐར་གྲོས་གཞི་དོན་ཚན་བརྒྱད་པོ་སྤྱི་མོས་ཀྱིས་གཏན་འབེབས་ཐུབ་པ་བྱུང་ཞིང་། ཚོགས་ཆེན་ཐེངས་བརྒྱད་པ་རྒྱལ་ཁའི་ངང་མཇུག་བསྡུས་ཏེ། དགེ་རྩ་ཕན་བདེའི་འབྱུང་གནས་རྒྱལ་བསྟན་ཡུན་གནས་དང་། དེ་འཛིན་སྐྱེས་བུའི་གཙུག་རྒྱན་༧སྤྱི་ནོར་༧གོང་ས་༧སྐྱབས་མགོན་༧རྒྱལ་བའི་དབང་པོ་མཆོག་གིས་དབུས་རིས་མེད་སྐྱེས་ཆེན་ཁག་གི་སྐུ་ཚེ་ཡུན་དུ་བརྟན་ཅིང་། མཛད་འཕྲིན་ཕྱོགས་མཐར་ཁྱབ་སྟེ། ལུས་ཅན་མཐའ་དག་བདེ་སྐྱིད་རྫོགས་ལྡན་གསར་བའི་དཔལ་ཡོན་ལ་ལོངས་སྤྱོད་པའི་སྨོན་ལམ་རྣམ་པར་དག་པའི་མཚམས་སྦྱོར་དང་བཅས་མཇུག་ཡོངས་སུ་གྲུབ་པར་བྱས་སོ།།

ཕྱི་ལོ་ ༢༠༡༨ ཟླ་ ༧ ཚེས་ ༥ ཉིན།