རིས་མེད་ཀྱི་མདོ་སྔགས་ཟུང་གི་ལྟ་གྲུབ་བགྲོ་གླེང་ཚོགས་ཆེན་ཐེངས་དང་པོ།

ཐེངས། 116285 བཀླགས་འདུག

རིས་མེད་ཀྱི་མདོ་སྔགས་ཟུང་གི་ལྟ་གྲུབ་བགྲོ་གླེང་ཚོགས་ཆེན་ཐེངས་དང་པོ་དེ་གཡུང་དྲུང་བོན་གྱི་གདན་ས་ཆེན་མོ་དཔལ་གཤེན་བསྟན་སྨན་རིའི་གླིང་དུ་འདི་ཟླའི་ཕྱི་ཚེས་༢༣ དང་༢༤ བཅས་ཉིན་གཉིས་རིང་འཚོགས་སྟེ་ཕྱི་ཚེས་༢༤ ཉིན་ཟབ་རྒྱས་སྤྲོ་གསུམ་གྱི་ངང་བགྲོ་གླེང་གྲོལ་ཡོད་པ་རེད།
དེ་ཡང་རྒྱ་གར་ས་གནས་རྒྱལ་སྤྱིའི་བོད་བརྒྱུད་རིས་མེད་མཐུན་ཚོགས་རྒྱུན་ལས་སྐབས་དང་པོའི་གྲོས་གཞི་དང་གྲོས་ཆོད་ལྟར་རིས་མེད་ཀྱི་མདོ་སྔགས་ཟུང་གི་ལྟ་གྲུབ་བགྲོ་གླེང་ཚོགས་ཆེན་ཐེངས་དང་པོ་དེ་གཡུང་དྲུང་བོན་གྱི་གདན་ས་ཆེན་མོ་སྨན་རིའི་གླིང་དུ་འཚོག་ཐུབ་ན་བོད་ཀྱི་ལོ་རྒྱུས་བྱུང་རབས་དང་ད་ལྟའི་གནས་བབས་གང་གི་ཆ་ནས་ཀྱང་དགེ་མཚན་ཆེ་ལུགས་དབུས་གཡུང་དྲུང་བོན་འཛིན་སྐྱོང་ལྷན་ཚོགས་ལ་ཇི་ལྟར་ཡིག་ངག་གཉིས་ཀྱི་ལམ་ནས་འཕྲིན་དུ་གསོལ་བ་བཞིན། དབུས་གཡུང་དྲུང་བོན་འཛིན་སྐྱོང་ལྷན་ཚོགས་ནས་ཐེངས་འདིའི་བགྲོ་གླེང་ཚོགས་ཡུལ་དང་། སྐུ་མགྲོན་རྣམ་པའི་བཞུགས་གནས་དང་བགྲོ་གླེང་ཉིན་གཉིས་རིང་ཚོགས་བཅར་བ་ཡོངས་ལ་དུས་གསུམ་ཞལ་ལག་སོགས་མཐུན་རྐྱེན་གང་དགོས་སྦྱོར་རྒྱུའི་ཞལ་བཞེས་ཐོབ་པ་དང་། ལྷག་ཏུ་༧གོང་ས་ཡིད་བཞིན་ནོར་བུའི་བཀའ་ཡིག་སྤྱི་བསྩལ་བྱུང་བ་སོགས་རྟེན་འབྲེལ་ལེགས་ཚོགས་ཐམས་བཅད་དུས་སུ་སྨིན་ཏེ་ཐེངས་འདིའི་བགྲོ་གླེང་ཟབ་བརླིང་སྤྲོ་གསུམ་གྱི་ངང་འཚོགས་ཐུབ་པ་བྱུང་བ་རེད། དེའང་སྐབས་དེའི་ཉིན་གཉིས་ཀྱི་རིང་བགྲོ་གླེང་གི་མཛད་རིམ་ཇི་ལྟར་བསྐྱངས་བའི་ལོ་རྒྱུས་སྙིང་བསྡུས་ཚུལ་དུ་ཟིན་བྲིས་སུ་གདབ་ན་སྙམ། དེའང་ཕྱི་ཚེས་༢༢ པའི་སྔ་དྲོར་ཕྱོགས་མཐའ་ནས་མགྲོན་དུ་བསུས་པའི་རིས་སུ་མ་ཆད་པའི་ཆོས་རྒྱུད་དྲུག་གི་གསུང་བཤད་པ་དང་དབུས་རྒྱུན་དང་རྒྱུན་ཟུར་རྣམས་གདན་ས་སྨན་རིའི་གླིང་དུ་དགྱེས་འཛོམས་བྱུང་སྟེ་༧སྐྱབས་རྗེ་སྨན་རིའི་ཁྲི་འཛིན་༣༤ པ་མཆོག་དང་༧སྐྱབས་རྗེ་སྨན་རིའི་དཔོན་སློབ་རིན་པོ་ཆེ་རྣམ་པ་གཉིས་ཀྱི་སྐུ་མདུན་དུ་མཇལ་བཅར་ཞུས་ཏེ་གསེར་ཞལ་དངོས་མཇལ་གྱི་སྐལ་བཟང་ཐོབ། ཕྱི་ཟླ་༤ ཚེས་༢༣ ཉིན། ཞོགས་པའི་ཆུ་ཚོད་༨།༠༠ ཐོག་ཏུ་བགྲོ་གླེང་གི་དབུ་འབྱེད་མཛད་སྒོ་དབུ་འཛུགས་ཞུས་ཤིང་། ཚོགས་མགོན་དུ་ཇི་ལྟར་གསོལ་བ་བཏབ་པ་བཞིན་༧སྐྱབས་རྗེ་སྨན་རིའི་ཁྲི་འཛིན་རིན་པོ་ཆེ་མཆོག་ཆིབས་བསྒྱུར་བསྐྱངས་ཏེ་ད་རེས་ཀྱི་བགྲོ་གླེང་འདི་ནས་དབུ་བཙུགས་ཏེ་རིམ་གྱིས་ཆོས་བརྒྱུད་ཕན་ཚུན་བར་ལྟ་གྲུབ་ལ་རྨོངས་པའི་མུན་པ་བསལ་སྟེ་ཤེས་རབ་ཀྱི་སྣང་བ་རྒྱས་པའི་རྟེན་འབྲེལ་མཚོན་བྱེད་དུ་སྣང་གསལ་མར་མེ་ཞལ་ཕྱེ་གནང་སྟེ་གདན་བཞུགས་ཐོག་ཆོས་བརྒྱུད་དྲུག་གི་བགྲོ་གླེང་གསུང་བཤད་གནང་མཁན་སློབ་དཔོན་རྣམ་པ་དྲུག་དང་རྒྱུན་ལས་དང་རྒྱུན་ཟུར་རྣམས་ཀྱིས་༸སྐྱབས་རྗེ་སྨན་རིའི་ཁྲི་འཛིན་རིན་པོ་ཆེ་མཆོག་ལ་མཎྡལ་སྐུ་གསུང་ཐུགས་རྟེན་ཕུལ་ཞིང་། དེའི་རྗེས་སུ་ཉིན་དེའི་བགྲོ་གླེང་ཚོགས་འདུའི་མདོ་འཛིན་པ་སྨན་རིའི་དགེ་བཤེས་ཤེས་རབ་རྣམ་རྒྱལ་མཆོག་ནས་མདོ་འཛིན་འོག་སྔོན་འགྲོའི་མཛད་རིམ་དབུ་འཛུགས་གནང་ཡོད་པ་དང་། དེ་རྗེས་དབུས་གཡུང་དྲུང་བོན་འཛིན་སྐྱོང་ལྷན་ཚོགས་ཀྱི་ཟུང་དྲུང་དགེ་བཤེས་གཡུང་དྲུང་སྐལ་བཟང་ལགས་ནས་བགྲོ་གླེང་གོ་སྒྲིག་ཞུས་ཕྱོགས་སྐོར་གྱི་གསུང་བཤད་གནང་ཡོད་པ་རེད། དེ་རྗེས་རྒྱ་གར་ས་གནས་རིས་མེད་ཆོས་རྒྱུད་མཐུན་ཚོགས་ཀྱི་ཚོགས་གཙོ་དཔལ་ལྡན་ས་སྐྱ་པའི་མཁན་པོ་ཁྲིཿའགྱུར་མེད་རྡོ་རྗེ་མཆོག་ནས་ཀྱང་རིས་མེད་བགྲོ་གླེང་གི་དགེ་ཕན་དང་དམིགས་ཡུལ། ལྷག་པར་དུ་གདན་ས་འདིར་ཚོགས་དགོས་པའི་དམིགས་ཡུལ་དང་རྒྱལ་སྤྱིའི་རིས་མེད་ཆོས་བརྒྱུད་མཐུན་ཚོགས་དབུས་ས་གཉིས་ཀྱི་བྱུང་རབས་ལོ་རྒྱུས་ངོ་སྤྲོད་དང་། ༸སྐྱབས་རྗེ་སྨན་རིའི་ཁྲི་འཛིན་སོ་བཞི་པ་མཆོག་གསར་དུ་གསེར་ཁྲི་ལ་ཕེབས་པའི་གནས་བབ་ཡིན་ནའང་འདྲ། གནས་ཚུལ་མང་པོ་ཞིག་གི་རྟགས་དང་རྟེན་འབྲེལ་སོགས། དགོས་པ་རྒྱུ་མཚན་མང་པོ་ཞིག་ལ་བརྟེན་ནས་གནས་འདིར་ཚོགས་འདུ་འཚོགས་ཐུབ་པའི་ཀུན་སློང་དོན་ཐོག་ཏུ་སྨིན་པར་དགའ་མོས་ཞུ་བཞིན་ཡོད་ཅེས་གསུང་གནང་བ་དང་། དབུས་རྒྱལ་སྤྱིའི་རིས་མེད་ཆོས་བརྒྱུད་མཐུན་ཚོགས་ཀྱི་ཚོགས་གཙོ་ཟུར་པ་བསོད་རྒན་རིན་པོ་ཆེས་༧གོང་ས་མཆོག་ནས་རིས་མེད་ཀྱི་མདོ་སྔགས་ཟུང་གི་ལྟ་གྲུབ་བགྲོ་གླེང་གི་སྐབས་འདིར་ཆེད་དུ་བསྩལ་གནང་བའི་གསུང་འཕྲིན་ལྗགས་ཀློག་གནང་བ་དང་རིས་མེད་བགྲོ་གླེང་འདི་ནི་མི་སྒེར་གྱི་ཐོབ་ཐང་དང་། རང་དོན་ཕྱོགས་ལྷུང་། དཔལ་འབྱོར་བསྡུ་སྒྲུབ་སོགས་མ་ཡིན་པར་བསྟན་པ་སྤྱི་ལ་ཕན་སེམས་དགོས་པ་དང་། མ་འོངས་པར་ཕྱོགས་མཐའ་ཁག་ནས་ཚོགས་འཆར་ཡོད་པའི་གསུང་བཤད་གནང་སོང་།
དེའི་རྗེས་ཐེངས་འདིའི་རིས་མེད་བགྲོ་གླེང་གི་སྐུ་མགྲོན་གཙོ་བོ་༧སྐྱབས་རྗེ་རྒྱལ་བ་སྨན་རི་བ་མཆོག་ནས་འཛམ་གླིང་འདིར་འཚོ་བཞུགས་གནང་བའི་སེམས་ཅན་ཀུན་གྱི་བསམ་བློ་གཅིག་གྱུར་མིན་ཕྱིན་ཆོས་ལུགས་མི་འདྲ་བ་མང་པོ་དགོས་ངེས་ཞིག་དང་། བོད་གངས་ཅན་ལྗོངས་ཀྱི་བོད་མི་ཡོད་དོ་ཅོག་སྟོན་པ་གཉིས་ཀྱི་རྗེས་འཇུག་པ་ཤ་སྟག་ཡིན་ཕྱིན། ཆོས་ལུགས་ཕན་ཚུན་བར་གྱི་མཐུན་འབྲེལ་ནི་མི་རིགས་མཐུན་སྒྲིལ་དང་ཆོལ་གསུམ་མཐུན་སྒྲིལ་གྱི་ཐབས་ལམ་ཡག་ཤོས་ཡིན་པའི་བཀའ་སློབ་བསྩལ་བ་དང་། དེ་ཡང་ཆོས་ལུགས་མཐུན་སྒྲིལ་གྱི་རྩ་བ་དེའང་ཆོས་ལུགས་དེའི་བླ་མ་དང་དགེ་རྒན་དག་ལ་ཐད་ཀར་འབྲེལ་བ་ཡོད་ཕྱིན། རང་ཞེན་གཞན་སྡང་གི་བསམ་བློ་སྤངས་ནས་ཀུན་ལ་དག་སྣང་འོད་ཀྱིས་བརྒྱན་པ་ཞིག་ཡོང་ཐབས་འབད་དགོས་པའི་བཀའ་སློབ་བསྩལ་གནང་བ་རེད། མཐའ་དོན་དུ་ལོ་སྔོན་མར་གཡུང་དྲུང་བོན་གྱི་དབུ་ཁྲིད་༧སྐྱབས་རྗེ་དམ་པ་སྨན་རིའི་ཁྲི་འཛིན་སོ་གསུམ་པ་མཆོག་ཞིང་དུ་གཤེགས་སྐབས་༧གོང་ས་སྐྱབས་མགོན་རིན་པོ་ཆེ་གཙོས་ཆོས་ལུགས་ཁག་གི་བླ་ཆེན་དག་གིས་གདུང་སེམས་མཉམ་སྐྱེད་ཀྱི་གསུང་འཕྲིན་དུ་མ་འབྱོར་བར་ཐེངས་འདིའི་ཚོགས་འདུའི་གོ་སྐབས་བརྒྱུད་ནས་བཀའ་དྲིན་ཆེ་ཞེས་བཀའ་སློབ་གྲུབ་རྗེས་ཉིན་འདིའི་མདོ་འཛིན་པས་ཐུགས་རྗེ་ལེགས་གསོལ་ཞུ་བའི་གསུང་བཤད་གནང་ནས་དབུ་འབྱེད་མཛད་སྒོ་ལེགས་པར་གྲོལ་ཡོད་པ་རེད།

བགྲོ་གླེང་དངོས་གཞིའི་ཚོགས་ཐུན་དང་པོར། གདན་ས་ཆེན་མོ་དཔལ་གཤེན་བསྟན་སྨན་རིའི་གླིང་གི་བཤད་སྒྲུབ་མཁན་པོ་དགེ་བཤེས་ཉི་མ་དོན་འགྲུབ་མཆོག་ནས་ཆུ་ཚོད་གཅིག་གི་རིང་གཡུང་དྲུང་བོན་གྱི་༼བླ་མེད་རྫོགས་པ་ཆེན་པོའི་གཞུང་ཆེན་སྡེ་བཞིའི་ངོ་སྤྲོད༽ཅེས་བླ་མེད་རྫོགས་པ་ཆེན་པོའི་གཞུང་ཆེན་སྡེ་བཞིའི་ངོས་འཛིན་དང་། རྫོགས་ཆེན་གྱི་བུ་བཞིའི་ངོ་སྤྲོད། རྫོགས་ཆེན་ཞེས་པའི་ཐ་སྙད་དེ་གཉིས་ཀྱི་ངོ་སྤྲོད། རྫོགས་པ་ཆེན་པོའི་ལྟ་སྒོམ་སྤྱོད་འབྲས་ཀྱི་རྣམ་གྲངས། རྫོགས་པ་ཆེན་པོའི་གཞི་ལམ་འབྲས་བུའི་རྣམ་གྲངས། རྫོགས་པ་ཆེན་པོའི་ལྟ་བའི་ངོ་སྤྲོད་ཐེག་འགྲེལ་མེ་ལོང་དགུ་སྐོར་གྱི་དགོངས་དོན། ཇི་བཞིན་ཉིད་ཀྱི་སྐྱེ་མཆེད་ཀྱི་ངོ་སྤྲོད་རྩོད་སྤང་སྨྲ་བའི་སེང་གེའི་དགོངས་དོན། རྫོགས་པ་ཆེན་པོའི་ལྟ་སྒོམ་སྤྱོད་འབྲས་བཞི་ཡི་ངོས་འཛིན་བླ་ཆེན་དྲན་པ་ནམ་མཁའི་དགོངས་དོན།
རྫོགས་པ་ཆེན་པོའི་ལྟ་བ་འདི་མཐའ་བཞིའི་རྒྱ་ལས་གྲོལ་ཚུལ་རྫོགས་ཆེན་གཞུང་གི་དགོངས་དོན། རྫོགས་པ་ཆེན་པོའི་གཞི་ལམ་དང་སྒོམ་འབྲས་རྣམས་བདེ་བའི་རང་བཞིན་ཡིན་པའི་རྒྱུ་མཚན། ཐུན་མོང་མ་ཡིན་པའི་སྟོང་ཉིད་འཇོག་ཚུལ་གསེར་གྱི་གདམས་པའི་དགོངས་དོན་སོགས་ལུང་རིགས་ཟུང་འབྲེལ་གྱིས་གསེད་བཀྲོལ་བྱས་ཤིང་། གསུང་བཤད་གྲུབ་རྗེས་ཆུ་ཚོད་ཕྱེད་ཀར་ཐེངས་འདིའི་རིས་མེད་བགྲོ་གླེང་གི་གསུང་བཤད་སློབ་དཔོན་རྣམས་དང་བགྲོ་གླེང་གི་ཆ་ཤས་ལེན་པར་འབད་པའི་སློབ་གཉེར་བ་རྣམས་ནས་དྲི་བ་དྲིས་ལན་ལས་རིམ་གྱིས་གསུང་བཤད་རིམ་པ་དང་པོ་མཇུག་གྲུབ་པར་བྱས་ཡོད་པ་རེད།

གསུང་བཤད་རིམ་པ་གཉིས་པར་སྔ་འགྱུར་རྙིང་མའི་མཁན་པོ་འགྱུར་མེད་རྡོ་རྗེ་མཆོག་ནས་ཆོས་བརྒྱུད་རིས་མེད་ཞེས་པ་ནི་ཆོས་ལུགས་ཐམས་ཅད་གཅིག་ཏུ་བསྒྱུར་བ་ལ་མི་འདོད་ལ། ཆོས་ལུགས་ཕན་ཚུན་ལ་གུས་བཀུར་དང་། གུ་ཡངས་ཀྱི་བསམ་བློ། ཆོས་སྐད་བཤད་ན་དག་སྣང་ཡོད་པ་ཞིག་ལ་རིས་མེད་ཞེས་ངོས་འཛིན་ཞུ་བ་ཡིན་ཞེས་རིས་མེད་ཀྱི་འགྲེལ་བརྗོད་སྔོན་དུ་གསུང་ནས་ ༼ཆོས་བརྒྱུད་རིས་མེད་ངོས་འཛིན་སྟངས་དང་ལྟ་བའི་རྣམ་གཞག་རིག་འཛིན་བླ་མའི་ཞལ་ལུང་།༽ཞེས་པའི་བརྗོད་གཞི་ཐོག་ནས་སྔ་འགྱུར་རྙིང་མའི་ཐེག་པ་རིམ་པ་དགུའི་སྐོར། གསར་རྙིང་གི་དབྱེ་བ་འབྱེད་སྟངས། སེམས་ཀློང་མན་ངག་གི་སྡེ་འཇོག་ཚུལ། རྫོགས་ཆེན་གྱི་བརྒྱུད་རིམ། མདོ་སྔགས་ཀྱི་ལྟ་གྲུབ་སྐོར། བཀའ་ཐོག་མཐའ་བར་གསུམ་གྱི་དབང་དུ་བྱས་པའི་རིགས་འཇོག་ཚུལ་གསུང་ནས་ཆུ་ཚོད་གཅིག་རིང་གི་གསུང་བཤད་མཇུག་གྲུབ་རྗེས་དྲི་བ་དྲིས་ལན་གྱི་མཛད་རིམ་བསྐྱང་ནས་གསུང་བཤད་མཇུག་གྲུབ་པ་གནང་།

ཉིན་རྒྱབ་ཆུ་ཚོད་༣པའི་ཐོག་རྒྱལ་བ་བཀའ་བརྒྱུད་པའི་མཁན་པོ་ཚུལ་ཁྲིམས་ཉི་མ་མཆོག་ནས་༼རྒྱལ་བ་བཀའ་བརྒྱུད་པའི་མདོ་དང་སྔགས་ཀྱི་ལྟ་གྲུབ་བརྗོད་པ་དྭགས་བརྒྱུད་བླ་མ་དགྱེས་པའི་ཞལ་ལུང་།༽ཞེས་པའི་བརྗོད་གཞི་གཏན་འབེབས་ཐོག་རྒྱལ་བ་བཀའ་བརྒྱུད་པའི་ལུགས་ཀྱི་ཟབ་མོ་དབུ་མའི་ལྟ་བ་དང་། གཞི་དབུ་མ་བདེན་གཉིས་ཟུང་འཇུག ལམ་དབུ་མ་ཚོགས་གཉིས་ཟུང་འཇུག འབྲས་བུ་དབུ་མ་སྐུ་གཉིས་ཟུང་འཇུག དབུ་མ་ཞེས་པའི་གོ་དོན། ཟབ་གསལ་སྔགས་ཀྱི་དབུ་མ། ཟབ་གསལ་སྔགས་ལུགས་ཀྱི་ཕྱག་རྒྱ་ཆེན་མོ། ཞར་བྱུང་དུ་རྒྱུད་སྡེ་བཞིའི་ཁྱད་པར་སོགས་རྒྱལ་བ་བཀའ་བརྒྱུད་པའི་ལྟ་གྲུབ་ཀྱི་རྣམ་གྲངས་རྒྱ་ཆེ་བ་གྲངས་མང་བ་སོགས་ཐེངས་འདིའི་བགྲོ་གླེང་དུ་མཉམ་བཞུགས་གནང་བའི་སློབ་གཉེར་བ་དག་གི་བགོ་སྐལ་དུ་བསྩལ་གནང་ནས་དྲི་ལན་གྱི་གོ་རིམ་དབུ་འཛུགས་གནང་ནས་གསུང་བཤད་རིམ་པ་གསུམ་པའི་བགྲོ་གླེང་མཇུག་གྲུབ་པར་བྱས་ཡོད་པ་རེད།

ཕྱི་དྲོ་ཆུ་ཚོད་༤།༣༠ནས་དཔལ་ལྡན་ས་སྐྱ་པའི་མཁན་པོ་ཁྲིཿའགྱུར་མེད་རྡོ་རྗེ་མཆོག་ནས་དཔལ་ས་སྐྱ་པའི་ཆོས་ལུགས་དང་གཡུང་དྲུང་བོན་གཉིས་བར་གནའ་ནས་འབྲེལ་བ་ཧ་ཅང་ཟབ་མོ་ཡོད་ལ། དེ་ཡང་དཔེ་མཚོན་ཙམ་ཞུས་ན་དཔལ་ས་སྐྱའི་ཕྱོགས་ནས་གོ་ཤག་སྟག་གསུམ་དུ་གྲགས་པ་རྣམས་ཀྱི་ཡིག་ཆ་གཞི་བཟུང་ས་གཙོ་བོ་ནི་རོང་སྟོན་ཤེས་བྱ་ཀུན་རིག་གྱི་ཡིག་ཆ་ལ་ཁུངས་གཏུགས། རོང་སྟོན་ཁོང་ནི་ཐོག་མར་བོན་གྱི་ཁྱིམ་ཚང་ཞིག་ཏུ་སྐུ་བསྟམས་པ་མ་ཟད་བོན་གྱི་གཞུང་ལུགས་སྐོར་ལ་མཁྱེན་རྒྱ་ཡངས་ཆེ་བའི་མཁན་པོ་ཞིག་རེད། ཁོང་ཐོག་མར་བོན་པོ་རང་རེད། སྐུ་ན་གཞོན་དུས་ས་སྐྱར་ཕབས་ཏེ་གཡག་མི་ཕམ་པ་སོགས་བསྟན་ཏེ་ས་སྐྱའི་གཞུང་ལ་མཁས་པར་གྱུར་པ་ཙམ་དུ་མ་ཚད་ས་སྐྱའི་ངོས་ནས་བཤད་ན་ས་སྐྱ་ལ་ཕྱག་རྗེས་ཆེ་བའི་ས་སྐྱའི་བསྟན་འཛིན་གྱི་སྐྱེས་ཆེན་ཞིག་ཏུ་གྱུར་པ་རེད་ཅེས་གསུངས་ནས་དཔལ་ལྡན་ས་སྐྱའི་གྲུབ་མཐའ་དང་བོད་ཀྱི་ཆོས་བརྒྱུད་ཁག་འབྲེལ་ལམ་བྱུང་ཚུལ། འགྲོ་མགོན་ཆོས་རྒྱལ་འཕགས་པས་བོད་གཅིག་གྱུར་བཟོས་ཚུལ། བོད་ཀྱི་ཆོས་བརྒྱུད་ཁག་གིས་ཆོས་ཀྱི་འཁོར་ལོ་རིམ་པ་གསུམ་ལ་དྲང་ངེས་འདྲེན་སྟངས་དང་རྣམ་གཞག་ཡོད་ཚུལ། དམིགས་བསལ་རོང་སྟོན་ཤཱཀྱ་རྒྱལ་མཚན་དང་པཎ་ཆེན་ཤཱཀྱ་མཆོག་ལྡན་གཉིས་ཀྱིས་འཁོར་ལོ་རིམ་པ་གསུམ་ལ་དྲང་ངེས་འདྲེན་ཚུལ། མདོ་སྔགས་གཉིས་ཐབས་ཀྱི་ཆ་ནས་མ་གཏོགས་ལྟ་བ་ལ་ཁྱད་པར་མེད་ཚུལ། གོ་བོ་རབ་འབྱམས་པས་ཐལ་རང་གཉིས་ཀྱི་ལྟ་བ་ལ་མཐའ་བཞི་འགོག་བྱེད་ཀྱི་རིགས་པའི་ཁྱད་པར་ལས་ལྟ་བ་མཐོ་དམན་གྱི་ཁྱད་པར་མེད་ཚུལ་སོགས་གསུང་བཤད་དང་དྲི་བ་དྲིས་ལན་གྱི་མཛད་རིམ་གྲུབ་ནས་ཉིན་དང་པོའི་བགྲོ་གླེང་མཇུག་གྲུབ་པ་བཅས་སོ།

ཕྱི་ཚེས་༢༤ཉིན་རིས་མེད་ཀྱི་མདོ་སྔགས་སེམས་གསུམ་གྱི་ལྟ་གྲུབ་བགྲོ་གླེང་ཚོགས་ཆེན་ཐེངས་དང་པོའི་ཉིན་གཉིས་པའི་བགྲོ་གླེང་མུ་མཐུད་དུ་གདན་ས་སྨན་རིའི་གླིང་གི་གཡུང་དྲུང་བོན་གྱི་དཔེ་མཛོད་ཁང་གི་ཚོམས་ཆེན་དུ་ཚོགས་ཡོད་པ་དང་།
སྔ་དྲོ་ཆུ་ཚོད་༨།༤༥སྟེང་དེ་རིང་གི་ཚོགས་འདུའི་མདོ་འཛིན་པ་མཁན་པོ་ཚུལ་ཁྲིམས་བཟང་པོ་མཆོག་གིས་མདོ་འཛིན་འོག་ཉིན་གཉིས་པའི་བགྲོ་གླེང་དབུ་འཛུགས་གནང་ཡོད་པ་དང་། ཉིན་འདིའི་ཚོགས་ཐུན་དང་པོའི་ཚོགས་འདུའི་གཙོ་སྐྱོང་བ་དགེ་བཤེས་བློ་བཟང་དབང་གྲགས་ལགས་ནས་རྒྱལ་བ་ཇོ་ནང་པའི་མཁན་པོ་ཀུན་དགའ་འཚམས་ཆུང་གི་ལོ་རྒྱུས་མདོར་བསྡུས་ཤིག་ཞུས་རྗེས། མཁན་པོ་ཀུན་དགའ་འཚམས་ཆུང་ཉིད་ནས་༼དཔལ་ལྡན་རྒྱལ་བ་ཇོ་ནང་བའི་མདོ་སྔགས་ཟུང་གི་ལྟ་གྲུབ་ངོ་བོ་གཅིག་པ་སྟོང་གཞི་དོན་དམ་བདེ་གཤེགས་སྙིང་བོའི་སྐོར་ཉུང་ཙམ་གླེང་བ་བློ་གསལ་དགའ་བའི་མུན་སེལ་སྒྲོན་མེ།༽ཞེས་པའི་བརྗོད་གཞི་ཐོག་བགྲོ་གླེང་གནང་ཡོད་པ་དང་། དེ་ཡང་དཔལ་རྒྱལ་བ་ཇོ་ནང་བའི་ཐུན་མིན་གྱི་ལྟ་གྲུབ་སྟོང་གཞི་དོན་དམ་བདེར་གཤེགས་སྙིང་བོ་འདི་ཉིད་བཀའ་ཐ་མ་ལེགས་པར་རྣམ་པར་ཕྱེ་བའི་ཆོས་འཁོར་གྱི་བརྗོད་དོན་གཙོར་བོར་གྱུར་བ་ཡིན་པར་གསུང་པ་དང་། ཐོག་མར་ལྟ་གྲུབ་དེ་ཉིད་འཛིན་པའི་རྩ་བའི་སློབ་དཔོན་ངོས་བཟུང་དང་། འདོད་པ་སྟོན་པའི་གཞུང་ལུགས། དེའི་མཚན་ཉིད། འདོད་པའི་ཁྱད་པར་དང་བཞིའི་ཐོག་ནས་སྟོང་གཞི་དོན་དམ་བདེར་གཤེགས་སྙིང་བོའི་ངོ་བོ་དང་། དེའི་ཁྱད་ཆོས་སོགས་ཀྱི་སྐོར་ནས་ཆུ་ཚོད་གཅིག་རིང་བགྲོ་གླེང་ལྷུག་པར་གནང་བ་དང་། དེ་རྗེས་དྲི་བ་དྲིས་ལན་གྱི་མཛད་རིམ་དབུ་འཛུགས་གནང་ནས་ཚོགས་བཅར་བ་བཙུན་པ་བཙུན་མ་རྣམས་ནས་རྒྱལ་བ་ཇོ་ནང་བའི་ལྟ་བའི་གཙོ་བོ་བདེ་གཤེགས་སྙིང་བོའི་སྐོར་ལ་དྲི་བ་དྲིས་ལན་བྱས་ནས་ཚོགས་ཐུན་དང་པོ་མཇུག་གྲུབ་ཡོད་པ་རེད།

ཚོགས་ཐུན་གཉིས་པའི་ཚོགས་འདུའི་གཙོ་སྐྱོང་བ་ཝར་ཎ་མཐོ་སློབ་ཀྱི་རྒན་ལགས་དགེ་བཤེས་ཕུན་ཚོགས་ཉི་མས་གནང་ཡོད་པ་དང་། གསུང་བཤད་སློབ་དཔོན་རི་བོ་དགེ་ལྡན་པའི་དགེ་བཤེས་ལྷ་རམས་པ་ངག་གི་དབང་ཕྱུག་ལགས་ནས་༼རི་བོ་དགེ་ལྡན་པའི་མདོ་སྔགས་ཀྱི་འོད་གསལ་དོན་དམ་བདེན་པ་བཞེད་མི་བཞེད་ཀྱི་བཟུང་མཚམས།༽ཞེས་པའི་བརྗོད་གཞི་ཐོག་ནས་གསུང་བཤད་དབུ་འཛུགས་གནང་ཡོད་པ་དང་། དེ་ཡང་མདོ་སྔགས་གཉིས་ཀའི་གཞུང་ལས་འོད་གསལ་ལ་སྟོང་ཉིད་དམ་དོན་དམ་པའི་བདེན་པ་ཞེས་ཚིག་ཟུར་ལ་ཡོད་ཀྱང་སྔ་རབས་པས་ཡེ་ཤེས་ལ་དོན་དམ་སྤྲོས་བྲལ་དངོས་བཞེད་ཅིང་། དེ་ཡང་འཇམ་མགོན་ཙོང་ཁ་པ་ཆེན་པོས་དམིགས་བསལ་གྱིས་ཡུལ་གྱི་མིང་ཡུལ་ཅན་ལ་བཏགས་པ་ཙམ་ལས་དངོས་མ་ཡིན་པའི་བཞེད་ཚུལ་དང་། བདེར་གཤེགས་སྙིང་བོ་དེ་ཡང་འབྲས་མིང་རྒྱུ་ལ་བཏགས་པ་ཙམ་ལས་སངས་རྒྱས་དངོས་སུ་མི་འདོད་ཚུལ། གནད་དེ་དག་གྲུབ་མཐའ་གཞན་དང་ཐུན་མོང་མ་ཡིན་པའི་འདོད་ཚུལ་བཞི་ཙམ་བགྲང་བ་དང་། དེ་ཡང་འོད་གསལ་གྱིས་ཆོས་ཀུན་ལ་ཁྱབ་ལུགས་ཀྱི་གནད། མདོ་སྔགས་ཀྱི་ལྟ་བ་གཉིས་ཡུལ་ལ་མཆོག་དམན་མི་འཇོག་པའི་གནད། ཡུལ་དོན་བདེན་པའི་མིང་ཡུལ་ཅན་འོད་གསལ་ལ་བཏགས་པའི་གནད། མཐའ་ཐམས་ཅད་རང་བཞིན་གྱིས་གྲུབ་པ་ལ་གནས་ཚུལ་གྱི་གནད་སོགས་ནས་བགྲོ་གླེང་གནང་ནས་དྲི་བ་དྲིས་ལན་གྱི་རིམ་པ་བཅས་ཐེངས་འདིའི་བགྲོ་གླེང་གི་གསུང་བཤད་སློབ་དཔོན་རྣམས་ཀྱི་གསུང་བཤད་མཇུག་གྲུབ་པར་བྱས་ཡོད་པ་རེད།

ལས་རིམ་མཐའ་མར་ཐེངས་འདིའི་མཇུག་བསྡོམས་མཛད་སྒོར་སྐུ་མགྲོན་གཙོ་བོ་༧སྐྱབས་རྗེ་སྨན་རིའི་དཔོན་སློབ་རིན་པོ་ཆེས་ཐེངས་འདིའི་རིས་མེད་བགྲོ་གླེང་ཆེན་མོ་འདི་གདན་ས་འདིར་འཚོགས་ཐུབ་པ་ནི་བསྐལ་བ་བཟང་པོ་ཞིག་ཏུ་ངོས་འཛིན་ཞུ་བཞིན་ཡོད་ལ། སྔོན་གྱི་ལོ་རྒྱུས་གང་མང་ཞིག་ཏུ་ཆོས་ལུགས་གྲུབ་མཐའ་ཕན་ཚུན་བར་ལ་ཕྱོགས་རིས་ཆགས་སྡང་གི་སྦྱོར་བ་གང་མང་བརྩམས་ཡོད་ཀྱང་། དེ་དག་ནི་ཆོས་ལུགས་ངོས་ཀྱི་སྐྱོན་ཆ་མ་ཡིན་པར་ཆོས་པ་རང་ཉིད་མ་རྟོགས་ལོག་རྟོག་གི་དབང་དུ་སོང་བ་ཡིན་པས། དེང་གི་ཆར་དགེ་འདོན་སྐྱོན་སེལ་གྱི་སྒོ་ནས་རིས་མེད་ཆོས་ལུགས་གང་གི་གཞུང་རྣམས་ལ་གཟིགས་རྟོགས་བྱེད་དགོས་པར་གསུངས་པ་དང་། གྲུབ་མཐའ་རིས་མེད་ཀྱི་ལྟ་གྲུབ་དག་གཞི་གཅིག་ལ་མིང་ཐ་དད་གདགས་པ་ཙམ་ལས་དོན་གྱི་སྙིང་བོ་གཅིག་ཏུ་འདུས་ཡོད་ཚུལ་སོགས་ཀྱི་བཀའ་སློབ་ཟབ་རྒྱས་གྲུབ་མཚམས་༧སྐྱབས་རྗེ་སྨན་རིའི་དཔོན་སློབ་རིན་པོ་ཆེས་ཐེངས་འདིའི་རིས་མེད་བགྲོ་གླེང་གི་གོ་སྒྲིག་པའི་ངོས་ནས་གསུང་བཤད་སློབ་དཔོན་རྣམས་དང་བཀོད་སྒྲིག་མི་སྣ་དག་ལ་ཐུགས་རྗེའི་གསོལ་རས་གནང་ཡོད་པ་རེད།
མཐའ་དོན་ཉིན་འདིའི་མདོ་འཛིན་པ་མཁན་པོ་ཚུལ་ཁྲིམས་བཟང་པོ་མཆོག་ནས་ཐུགས་རྗེ་ལེགས་གསོལ་གྱི་གསུང་བཤད་གནང་བ་དང་། རིས་མེད་བགྲོ་གླེང་གི་མ་འོངས་པའི་འཆར་གཞི་སོགས་ནས་གསུང་བཤད་གནང་ནས་ཐེངས་འདིའི་བགྲོ་གླེང་ཡོངས་སུ་མཇུག་གྲུབ་པ་ཞུས།  ཉིན་གཉིས་ཀྱི་མཛད་རིམ་ཆ་ཚང་དྲ་ལམ་ཐོག་ཐད་གཏོང་བྱས་ཤིང་། བསྐྱར་དུ་གཟིགས་འདོད་ཡོད་མཁན་ཚོ་ངོ་དེབ་དྲ་བྱང་Remed Chogyud Thuntsok འདིའི་ཐོག་ཏུ་ཕེབས། ད་དུང་རིས་མེད་ཆོས་རྒྱུད་ཚོགས་པའི་ལོ་རྒྱུས་ཞིབ་ཕྲ་མཁྱེན་འདོད་ཡོད་ཚེ་དྲ་བྱང་www.iantrt.org འདིའི་ཐོག་ཏུ་ཕེབས། གསར་འགྱུར་མཁོ་སྤྲོད་པ་རྒྱ་གར་ས་གནས་རྒྱལ་སྤྱིའི་བོད་བརྒྱུད་རིས་མེད་མཐུན་ཚོགས་ཀྱི་ཚོགས་གཙོ་ཁྲིཿའགྱུར་མེད་རྡོ་རྗེས་ཕྱི་༢༠༡༨ ཟླ་༤ ཚེས་༢༧ ཉིན་ཕུལ། །